Moakst mett???

Fe daut Projatjt "Mien Lexikon" fehle noch een poa Schiela en een poa Jury-Mettjlieda...

Entresse???

Wan wie welle, dan woat dee Plautdietsche Wikipedia daut baste en daut jratste Lexikon (Enzyklopedie) fe dee plautdietsche Sproak en fe dee plautdietsche Mensche oppe gaunze Welt...

Tom Foto: Dit Hus habe miene Ellre jebut, aus see von Russlaunt no Dietschlaunt trocke. Bett latste Weatj wohnd miene Sesta Ani doa benne. Dee Menniste oppe gaunze Welt bue emma wada en opp emma wada niee Steda eare Hiesa. Uck wan boolt aundre Mensche doa benne wohne, onse Hiesa bliewe. Onse Jeschichte bliewe. Onse Leeda bliewe. Uck onse Wikipedia-Artikel bliewe. Uck wan boolt aundre Mensche aun onsem Artikel wiedaschriewe ;-)

Waut doone?

Daut plautdietsche Wikipedia-Projatjt "Mien Lexikon" tjemmt langsaum to Staund. Neachste Weatj fang wie aun, Artikel to schriewe en Punkte to vedeele. Wea woat waut doone?

Waut doone dee 10 Schiela?

Jieda Weatj sat sich dee Schiela, woona mettmoakt, ver sien Computa en hupst enne plautdietsche Wikipedia nenn. Dan klickt hee ooda see opp eenen von dee roode Links en schrift eenen korten nieen Artikel. Eenfach een poa plautdietsche Informatioone ewa daut Wot, omm woont et jeit. Ute dietsche ooda enjlische ooda ut eene aundre Wikipedia-Versioon ewasate, daut jeit uck, en daut bruck nich soo vel Tiet...

Waut doone dee 10 Jury-Lied?

Eenmol enne Weatj tjrieje dee eene Email mett 10 Links. Daut send Links to dee 10 niee Artikel vonne Schiela. Dee Jury jefft dan fe jiedren Artikel 10 Punkte, wan aules goot es. Meea Informatioone stohne wieda unje...

Soo jeit daut dan 10 Weatj. Dan habe sich dee Schiela mett eare Artikel en mett eare Punkte waut Scheenet vedeent! En dee plautdietsche Wikipedia woat emma jrata en beta :-)